Тешко е да се каже дека нашите патувања ги реализираме според некој план, кога истиот се менува од минута во минута. Така се случи и оваа авантура, кога наместо да ја пешачиме нашата омилена рута с. Папрадиште – ПД Чеплес, се пренасочивме во областа Азот, која е дом на можеби најубавата природа во Македонија

Дојдовме во село Ореше, село кое е сместено на падините на планината Јакупица. За брзо го заобиколивме и ги разгледавме старите куќи преку кои можете да ја прочитате историјата на местото, а веднаш потоа се упативме кон најпознатиот манастир во овој крај – манастирот св. Ѓорѓија️

Тој е почетната точка на нашата прошетка, која води до ваква планинска идила како од сликите. Лево од паркингот на манастирот ќе наидете на дрвено мовче, а кога ќе го преминете, патеката сама ќе ве однесе до водопадот. Истата е маркирана и има должина од околу 1.5 километри во правец

Сите вие кои се жалевте дека не можете многу да пешачите, дека не сте тип за долги прошетки во планина – ова е вашата шанса!  Кратка и лесна патека и ја препорачуваме на секој еден од вас кој ќе се најде во близина на оваа прекрасна природа! Водопадот кај село Ореше го ставивме на листата на најубави водопади во Македонија

Ако сте за full time experience, можете да си резервирате соба во конакот кој е дел од манастирот и да си поминете викенд на чист воздух, на 1100мнв

Ве чекаме да отидете и да ни пишете ваш впечаток!

Се гледаме на планина,

Ана и Мане