На само 3 километри од Пријонија, возејќи по истиот пат за назад, ќе наидете на знаци кои ве насочуваат кон стариот манастир на Дионис, а ние топло ви препорачуваме да не го одминувате. Вешто скриен во густите шуми на националниот парк, ќе ви изгледа како да сте стигнале на слепа улица која води до некакви руини. Тоа беше и нашиот прв впечаток, но дадовме шанса и сепак испаднавме да видиме што се крие позади нив. Станува збор за православен манастир кој датира од 16 век, делумно реконструиран за и денес да ги задоволи основните потреби, делумно оставен автентичен, сам за себе да зборува за долгата историја.

Внатре владее мир и хармонија, а погледите кон Олимп ќе ве наведат да мислите дека навистина планината го чува овој манастир.

Едни од најубавите водопади на Олимп се наоѓаат во близина на селото Дион. Додека се движите по тесната патека ќе ви се чини дека сте на погрешно место, но имајте трпение затоа што вистинските богатства секогаш се срамежливи и таинствени во дивината. Наградата за вас ќе биде разладување во ладните базени, а ќе добиете и неочекуван одмор на телото и умот. 

Пристапувате преку селото Дион, можете да се движите по насоките од Google Maps. Од водопадот Orlias ве делат неколку минути пешачење, а од Kokkinos Vrahos неполн час.

Магично и живописно место кое не смеете да го прескокнете доколку сте дојдени да го истражувате Олимп! Се стигнува брзо и лесно, но тешко се заминува! Како и претходните два водопади, се наоѓа во околината на Дион, но овојпат треба да се упатите прво кон селото Karitsa, а подоцна кон Vrontou. Ги следите патоказите до манасторот Ekklisia Agia Kori, покрај кој има голем паркинг. Оттука, погледнете кон дрвената табла и продолжете да ги следите ознаките кои ќе ви го покажат шумскиот пат до водопадот, а потоа препуштете се во магијата на оваа оаза!